Puma

Puma
Phuyuq wawan uqi mici
phiña uywa rumi maki
urqullantan purichkanki
rit’illanta k’umu k’umu
 
Phiña phiña qhawarispan
phuyutaraq picharinki
chupaykita maywirispan
urqukunata mayt’unki
 
Yawarkichka sunkhaykiwan
intitaraq llakllachinki
qalluykitaq sansaq puka
yawartaña llaqwarichkan
 
Apukunaq sumaq uywan
inkakunaq yupaychanan,
yarqasqachu purichkanki
aychatachu machkachkanki?
 
Hamuy ñuqa qarasqayki
kay sunquyta qhasurispa,
qhasquypatapi thallaykuy
llakiykunata ñit’iykuy
 
Qaqa hasp’iq silluykiwan
hank’uykunata watariy
hinaspataq puñuchiway
ama llaki muchunaypaq.
Autor: Andrés Alencastre Gutiérrez